جوزى بيحرجنى أمانى السيد
واتدفن تحت رجليا النهاردة. ورقة طلاقى توصلى على بيت أهلى بالذوق، بدل ما المحاكم هى اللى هتجيبلى حقى وتفضحه أكتر من كدة.. اطلع برة!.
وقف ثوانى وشه بيغلى من القهرة والغل، بس ملقاش قدامه أى حل تانى، الكبرياء المزيف اللى كان عايش بيه اتكسر، ونزل راسه فى الأرض وخرج من الباب يجرجر خيبته، ورزعت الباب وراه برزعة هزت العمارة كلها.
أول ما رزعت الباب وراه، حسيت إن جبل اتشال من على صدري. لفيت ورجعت الصالة، وبصيت حواليا؛ الهيصة خلصت، ومبقاش فيه غير آثار الفضيحة اللي هو عملها لنفسه ولأهله.
مسكت تليفوني وأنا إيدي بتترعش بس من الحماس، واتصلت ببابا.
أيوة يا بابا.. تعالالي حالاً إنت وأخواتي، ومش عايزة مخلوق من أهل حسام يعرف إنكم جايين. بابا حس بلهجتي، وسألني خير يا بنتي؟، قولتله كل خير يا بابا، تعالوا بس وهتعرفوا كل حاجة.
مفيش نص ساعة وباب الشقة خبط، كان بابا وأخواتي الاتنين، ومعاهم واحد صاحبه نجار. بابا دخل وبص للصالة المتبهدلة، وسألني إيه اللي حصل؟ وفين حسام؟.
حكيتلهم كل حاجة من طقطق لسلام عليكم، من أول العزومة لحد ما عزم على الحفلة، وقولتلهم على الحركة اللي عملتها، وريتلهم عقد الشقة باسمي. بابا وشه احمر من الغيظ، وأخواتي عروقهم نفخت، والنجار كان واقف مذهول.
بابا بص للنجار وقاله شمر إيدك يا أسطى، غير كالون الباب ده حالاً، ومش عايز نسخة من المفتاح القديم تشتغل تاني. النجار بدأ شغله، وبابا مسك تليفونه واتصل بحسام.
أيوة يا حسام.. تعالالي حالا على الشقة، وإلا وعهد الله هجيلك بيت أبوك وألم عليك أمة لا إله إلا الله. بابا قفل السكة قبل ما حسام يرد، ووقف يستناه في نص الصالة، وأخواتي واقفين وراه زي الأسود.
حسام جيه بعد ربع ساعة، وشه كان مخطوف، وباين عليه الرعب. النجار كان خلص تغيير الكالون، وكان بابا وأخواتي واقفين مستنيينه.
أول ما دخل، أخويا الكبير قفل الباب وراه، وبابا قاله بنبرة تخوف اسمع يا حسام.. الليلة دي انتهت، والمهزلة دي اتقفلت. الشقة دي شقة بنتي، والعفش ده عفشها، وإنت مالكش فيها ولا فتفوتة. الكالون اتغير، والمفاتيح القديمة مابقاش ليها لازمة.
حسام جه يتكلم، بس بابا قاطعه بحدة اسمع للأخر.. ورقة طلاق بنتي توصلي على بيتى بكرة الصبح، وتديها كل حقوقها، المؤخر والنفقة والمتعة، وترجعلها كل دهبها اللي أخدته منها. وإلا وحق الله، هرفع عليك قواضي فضايح، وهجرجرك في المحاكم، وهخلي عيلتك كلها تتبرى منك بعد اللي عرفوه النهاردة.
أخويا الصغير قرب منه وقاله بهمس يخوف ولو فكرت تقرب من باب الشقة دي تاني، أو تضايق أختي بأي طريقة، ماتلمش غير نفسك.
حسام وقف مكسور، عينه في الأرض، ومش قادر ينطق بكلمة. بابا شاوره على الباب وقاله بقلة قيمة برة.. ومش عايز أشوف وشك هنا تاني.
حسام خرج يجر أذيال الخيبة، والباب اتقفل وراه مرة تانية، بس المرة دي الرزعة كانت بإنذار إن الحكاية خلصت، وإن الحق رجع لأصحابه. بابا وأخواتي خدوني في حضنهم، وحسيت لأول مرة من سنين إن ليا ضهر وسند، وإن الخوف اللي كان كاتم على نفسي اتبخر للأبد.
بعد ما الباب اتقفل وراه ووقع خطاويه على السلم اختفى، بابا لف وبصلي، عيونه كانت مليانة حنية وغيظ في نفس الوقت، خدني في حضنه وقالي حقك عليا يا بنتي، إحنا اللي سيبناكي تستحملي قليل الأصل ده وتداري على عيبه لحد ما اتفرعن وافتكرك مقطوعة من شجرة.
في اللحظة دي، الدموع اللي حبستها طول اليوم نزلت، بس مكانتش دموع قهرة ولا ضعف، دي كانت دموع الغسيل.. كأن روحي بتتطهر من سنين الذل والسكوت اللي عشتهم. إخواتي مقعدوش، شمروا دراعاتهم وبدأوا يلموا معايا الكبايات المتكسرة وينضفوا الصالة، وبابا نزل قعد تحت على القهوة اللي قصاد العمارة عشان يضمن إن لا حسام ولا حد من أهله يهوب ناحية البيت.
تاني يوم على العصر، التليفونات مبطلتش رن. أبوه كلم بابا بصوت مكسور وبيتأسف وبيقسم إنه ميعرفش حاجة عن المهزلة دي، وعمهأبو ميادةكان هيموت من الغيظ والفضيحة، جه بنفسه هو وأبوه لحد بيت أهلي عشان يعتذروا لبابا ويبرروا إن بنتهم كانت مخدوعة ومكنتش تعرف إنه بيضايف بيها في شقة مراته.
بابا قعد قصادهم حاطط رجل على رجل، ومقبلش أي تبرير ولا كلمة طبطبة، وقالهم جملة واحدة قطعت عرق وسيحت دم ابنكم ملوش قعاد عندنا، وكرامة بنتي مش لعبة.. ورقة الطلاق تتكتب الليلة، وكل قرش وكل مليم في القايمة والمؤخر يتدفع كاش قبل ما المأذون يحط قلمه، وإلا قسمًا عظيمًا لا المحاكم تقفل بيوتكم كلها.
حسام جه مع المأذون بالليل زي الكلب المضروب، وشه في الأرض ومش قادر يرفع عينه في عين أي راجل في القعدة، مضى على ورقة الطلاق وإيده بتترعش، ودفع كل قرش كان عليه وهو ساكت ومذلول قدام أبوه وعمه وإخواتي.
أول ما المأذون نطق كلمة أنتِ طالق، حسيت بنسمة هوا باردة دخلت صدري.. بصيت له وهو بيلم نفسه ويخرج مطرود من قعدة الرجالة، وقولت في سري اللي ترخص نفسها عشان مركب تمشي، بتغرق بيها.. والكرامة لما بتترد، بترجع تكسر عين اللي داس عليها. قفلت الباب وراهم، ورجعت شقتي النضيفة المعمرة، وأنا عارفة إن حياتي الحقيقية لسه بتبدأ النهاردة.
عدت الأيام اللي وراها
وأنا حاسة إني في كابوس صحيت منه على جنة. الشقة اللي كانت خانقاني بقت مملكتي الحقيقية، نضفتها من أثرهم ومن ريحتهم، وبقيت بفتح الشبابيك أدخل الشمس والهوا اللي كانوا ممنوعين عني.
حسام حاول يبعت ناس واسطة، ويكلم بابا تمن آلاف مرة، ويبعت رسايل استعطاف إنه ندمان وإن الشيطان شاطر وإن بيتي اتخرب وخسرت كل حاجة. بس بابا كان رده واحد زي السيف اللي بيبيع مرة بيبيع ألف، وبنتي مش بضاعة ترد وتستبدل.
أهله، حماتي وأخته، حاولوا يجوا البيت عشان يلموا الموضوع بالذوق، خايفين من كلام الناس والفضيحة اللي لقطتهم وسط قرايبهم وأصحاب أخته بعد ما الحكاية اتعرفت. وقفتلهم على الباب، ومسكت مقبض الباب بقوة وقولتلهم ببرود قاتل البيت ده ميدخلهوش غير المحترمين، وإنتوا مكانكم مش هنا.. اللي عايز يضايف بيا وبصحتي ويهيني في بيتي، ملوش عيش وملح عندي. وروني عرض كتافكم. قفلت الباب في وشهم ورزعت الترباس الجديد، وحسيت براحة ملهاش مثيل.
ميادة، المهندسة اللي كان عايز يتمنظر بيها، الحكاية وصلت لخطيبها الحقيقي ولأهلها، والخطوبة اتفسخت وبقت فضيحتها بجلاجل في العيلة، وعرفت إن الله حق، وإن اللي بتبني سعادتها على خراب بيت غيرها مابتتهناش.
أنا قعدت مع نفسي، وبدأت أخطط لحياتي من جديد. رجعت لشغلي اللي كنت سيبته عشانه، ونزلت كورس ديكور عشان أفرش شقتي على ذوقي أنا مش ذوق حد تاني. بقيت بخرج وادخل وراسي مرفوعة، ومبقتش بخاف من كلام حد ولا بكسف أقول لأ في وش أي حد يحاول يتجاوز حدود الأدب معايا.
الدرس كان قاسي، بس كان لازم منه عشان أفوق. عرفت إن الطيبة مش سكوت، وإن التضحية مش مذلة، وإن اللي ميصونش كرامته بنفسه، محدش هيصونهاله.. وأهم حاجة، عرفت إن بيت بابا مفتوح، وضهره مسنود، وإني بمليون راجل من نوعية حسام وأشكاله. قفلت الصفحة دي من حياتي، وفتحت صفحة جديدة كلها عزة ونفس مرفوعة، ومستقبل أنا اللي برسمه بإيدي.
